Vaqif Mustafazadənin xatirəsinə həsr olunmuş sərgi və konsert keçirilib

Bəstəkarın adını daşıyan 2 nömrəli Uşaq İncəsənət Məktəbində caz-muğam musiqi janrının banisi, Dövlət Mükafatı laureatı, Azərbaycanın Əməkdar Artisti Vaqif Mustafazadənin anadan olmasının 84-cü ildönümü münasibətilə sərgi və konsert təşkil olunub. Məktəbin şagirdləri və müəllimləri səhnədə görkəmli pianoçunun əsərlərini ifa ediblər.

Ev-muzeyinin direktoru və Vaqif Mustafazadə Xeyriyyə Fondunun sədri Afaq Əliyeva, əməkdar artist Akif Süleymanbəyli, əməkdar mədəniyyət işçisi Alla Bayramova və əməkdar artist Elnarə Dadaşova tamaşaçılara bəstəkarın həyat və yaradıcılığından danışıblar.

Tədbirdə tanınmış musiqiçilər, müğənnilər və bəstəkarlar iştirak ediblər. Məktəbin foyesində qonaqlara Vaqif Mustafazadəyə həsr olunmuş əsərlərdən və fotoreproduksiyalardan ibarət sərgi təqdim olunub.