Minlərlə müəllim yenidən attestasiyadan keçə bilməyib

Elm və Təhsil Nazirliyinin mətbuat xidmətindən verilən məlumata görə, 4000-ə yaxın müəllim təkrar attestasiyadan keçmək üçün tələb olunan keçid balını toplaya bilməyib. Təkrar attestasiya imtahanında 7296 müəllim iştirak edib, onlardan 3386 nəfər keçid balı alaraq müsahibə mərhələsinə keçib. Qalan 3909 müəllim yenidən imtahandan keçə bilməyib, imtahanda iştirak etməyən 402 müəllim isə attestasiyadan keçməmiş hesab olunur. Bu müəllimlərin müqavilələrinə əmək qanunvericiliyinə uyğun olaraq xitam veriləcək.

Bundan başqa, Müəllimlərin Sertifikatlaşdırılması Şurasının iclasında 2022 və 2023-cü illərdə 31 948 ibtidai sinif müəlliminin, o cümlədən Azərbaycan dili və ədəbiyyat müəlliminin attestasiyadan uğurla keçdiyi açıqlanıb. Nəticədə 8410 müəllimin əməkhaqqı 35 faiz, 23538 müəllimin maaşı isə 10 faiz artırılıb.