Kürdəmirdə Şəhid İslam Dünyamalıyevin anım mərasimi keçirilib

Kürdəmirdə 2023-cü ilin sentyabrında Azərbaycan ordusunun antiterror əməliyyatı zamanı həlak olmuş şəhid İslam Teymur oğlu Dünyamalıyevin xatirəsinə ehtiramla anım mərasimi keçirilib. Tədbirdə onun şərəfinə adlandırılan küçə və bulağın açılışı keçib. Mərasimdə şəhidin ailə üzvləri, Kürdəmir rayon İcra Hakimiyyətinin nümayəndələri, veteranlar, kənd sakinləri və rayon ictimaiyyətinin nümayəndələri iştirak ediblər.

2004-cü ildə Kürdəmir rayonunun Muradxan kəndində anadan olan İslam Teymur oğlu Dünyamalıyev 2022-ci ildə hərbi xidmətə gedib. 2023-cü il sentyabrın 19-20-də keçirilən antiterror əməliyyatı zamanı Ağdam rayonunun Sırxavənd kəndində həlak olub. Azərbaycan Prezidenti İlham Əliyevin 7 noyabr 2023-cü il tarixli sərəncamı ilə Dünyamalıyev ölümündən sonra 3-cü dərəcəli ”Vətənə xidmətə görə” ordeni və ”Vətən uğrunda” medalı ilə təltif edilib.