Güclü əlaqələr

Mineralnıye Vodıda (Stavropol diyarı) növbəti Rusiya-Azərbaycan regionlararası forum başa çatıb. Tədbirdə hansı aktual mövzuları müzakirə ediblər və nə üçün bu Azərbaycan üçün vacibdir, məqalədə oxuyun.

XII Rusiya-Azərbaycan regionlararası forum təxminən 700 iştirakçını birləşdirib, Azərbaycan nümayəndə heyəti aqrar-sənaye kompleksi, rəqəmsal texnologiyalar və turizm nümayəndələri də daxil olmaqla 150-dən çox insandan ibarət idi.

İştirakçılara salamları Azərbaycan və Rusiya prezidentləri İlham Əliyev və Vladimir Putin göndəriblər.

“Məmnuniyyətlə qeyd etmək istəyirəm ki, qarşılıqlı hörmət və etimad prinsiplərinə əsaslanan tərəfdaşlığımız çoxşaxəlidir və demək olar ki, bütün sahələri əhatə edir”, – İlham Əliyev bildirib. Həmçinin dövlət başçısı o faktı da əlamətdar adlandırdı ki, “forum tarixi dostluq və mehriban qonşuluq ənənələrinə, dərin mədəni və humanitar əlaqələrə əsaslanan Azərbaycan və Rusiya arasında Müttəfiqlik qarşılıqlı fəaliyyəti haqqında bəyannamənin imzalanmasının ikinci ildönümündə keçirilir”.

Regionlararası əməkdaşlıq Azərbaycanın öz ərazilərini qaytarması ilə əlaqədar xüsusi əhəmiyyət kəsb edir. Yeni regionların sürətləndirilmiş inkişafa ehtiyacı var ki, buna da Rusiya investorlarının gəlişi kömək edəcəkdir.

Artıq indi Azərbaycanda Rusiyanın iştirakı ilə böyük investisiya layihələri paketi həyata keçirilir,  Azərbaycanın baş nazirinin müavini Şahin Mustafayev forumda bildirdi. Onun sözlərini statistika təsdiqləyir: bizim ölkəmiz Rusiya iqtisadiyyatına 1 milyard dollardan çox, RF isə Azərbaycan iqtisadiyyatına 8,7 milyard dollardan çox sərmayə qoyub.

Forumda həmçinin RF subyektlərinin nümayəndələri ilə birbaşa regionlararası əməkdaşlıq məsələləri müzakirə edildi. Həştərxan vilayəti hökumətinin sədr müavini Kazbek Xadikov “Şimal-Cənub” BND-nin inkişafı üzrə birgə işlərin davam etdirilməsi haqqında danışıb, Stavropol diyarının iqtisadi inkişaf naziri Denis Polyubin isə yerli biznesin Azərbaycana investisiya etməyə hazır olduğunu bildirdi. Həmçinin forum çərçivəsində ölkəmizin RF-da səfiri Polad Bülbül oğlu Kabardin-Balkar hökumətinin sədri Əli Musukov ilə görüşüb: onlar hərtərəfli əməkdaşlıq haqqında razılığa gəliblər.

Daha bir müzakirə mövzusu bir ildən sonra Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası ərəfəsində ekoloji dialoqun inkişafı oldu. Azərbaycan Bərpa Olunan Enerji Mənbələri üzrə Milli Agentliyin direktoru Cavid Abdullayev Qarabağ regionunda karbonsuz energetikanın inkişafı üzrə layihənin həyata keçirilməsi haqqında danışıb və Rusiyanın bütün maraqlı şirkətlərini yeni elektrik stansiyalarının bərpası və tikintisi üzrə tenderlərdə iştiraka dəvət edib.

Forumda Xəzər məsələsi də qaldırılmışdır. Bununla əlaqədar ekspertlər “Xəzərin yaşıl standartı” qeyri-hökumət təşəbbüsünü müzakirə ediblər. Onun məqsədi – Xəzər dənizinin ekoloji problemlərinə diqqəti cəlb etmək və su anbarını qorumaq üçün zəruri olan təsərrüfat fəaliyyət standartlarını müəyyən etməkdir.

Forumun yekunu olaraq Bakı və Moskva beş ikitərəfli sənəd imzalayıblar. Onların arasında Azərbaycanda İxracın və İnvestisiyaların Təşviqi Agentliyi və “Stavropol diyarı Ticarət-Sənaye Palatası” İttifaqı, Azərbaycanın Kiçik və Orta Biznesin İnkişafı Agentliyi və “Kavkaz.RF” SC arasında, o cümlədən bir sıra digər sazişlər də var.

Azərbaycan və Rusiya regionları arasında birbaşa əlaqələrin formalaşması hər iki ölkənin iqtisadiyyatının artımının drayverlərindən biridir. Ümid edirik ki, regionlararası qarşılıqlı fəaliyyətin gələcək inkişafı yeni iş yerləri, sakinlərin gəlirlərinin və ümumilikdə milli rifahın artması şəklində öz bəhrəsini verəcəkdir.