Gələcəyin bayramı

Soçidə Ümumdünya Gənclər Festivalı başa çatıb. «Sirius» federal ərazidə Azərbaycan da daxil olmaqla 188 ölkədən nümayəndələr toplaşıb. Festival nə ilə yadda qaldı və bizim uşaqlarımız hansı qələbələr qazandılar, məqalədə oxuyun.

Soçidə ÜGF-2024 iştirakçıları dünyanın hər yerindən 20 mindən çox fəal və məqsədyönlü gənclər iştirak edib: təzəhəvəs sahibkarlar, perspektivli alimlər, istedadlı artistlər və idmançılar.

Xarici nümayəndələrin əksəriyyəti MDB ölkələrindən gəlib və liderlərdən biri Azərbaycan olmuşdur: bizim ölkəmizi festivalda 150 nəfər təmsil edib.

Azərbaycan nümayəndə heyətinin üzvü Məhəmməd Əliyevin sözlərinə görə, Ümumdünya Gənclər Festivalı yeni dostlar və yeni əlaqələr qurmaq üçün əla fürsət idi. Məhəmməd etiraf etdi ki, ona və dostlarına dünyanın müxtəlif yerlərindən öz mədəniyyətlərini təmsil edən, suvenirlər verən, onları milli adət və ənənələrlə tanış edən həmyaşıdlarını görmək çox xoş idi.

Festival çərçivəsində bir çox tədbirlər keçirilib. Fevralın 29-dan martın 7-dək Dünya Gəncləri Şəhərində “Sirius” meydançasında mühazirələr, ustad dərsləri, dəyirmi masalar, işgüzar oyunlar, konsertlər və tok-şoular təşkil olunub.

“Bilik. Birincilər” təhsil marafonun gedişatında festivalın iştirakçıları və qonaqları media nümayəndələri ilə söhbət etdilər. Onlardan biri, Rusiya XİN-nin rəsmi nümayəndəsi Mariya Zaxarovaya azərbaycanlı nümayəndələr ölkəmizin İkinci Qarabağ müharibəsində qələbəsinin rəmzi olan xarı-bülbül broşu hədiyyə etdilər.

Festivalın spikerləri arasında məşhur aktyorlar da var idi. Türkiyənin kino ulduzu Burak Özçivit Rusiya və Türkiyəyə birgə serial çəkməyi təklif etdi.

ÜGF-2024 idman proqramı çərçivəsində “IBA çempionlar gecəsi” boks turniri keçirilib. Onun qaliblərindən biri Azərbaycan idmançısı Murad Allahverdiyev olub.

İdmana aşiq olanlar üçün digər cəlbedici mərkəz “Alina” Beynəlxalq Uşaq Xeyriyyə Bədii Gimnastika Festivalı oldu. Tamaşaçılar qarşısında Rusiya və digər ölkələrdən, o cümlədən Azərbaycandan idmançılar çıxış etdilər.

ÜGF-2024 çərçivəsində yeni dünya rekordu da qeydə alındı: 73 millətin nümayəndələri əl-ələ verdilər və ən çoxmillətli “Dostluğun dəyirmi rəqsi”ni etdilər. Ən məşhur rus xalq rəqsində 150 ölkədən 2 min oğlan və qızı birləşdi. Onların arasında azərbaycanlılar da var idi. Bundan əlavə, bizim nümayəndə heyətimiz Dünya Gənclər Festivalı iştirakçılarının möhtəşəm paradına qatıldı.

Festivalın bağlanış mərasimində Rusiya Prezidenti Vladimir Putin çıxış etdi. Onun sözlərinə görə, müxtəlif mədəniyyətlərin və millətlərin nümayəndələrini, onların bütün fərqliliklərinə baxmayaraq, ənənəvi dəyərlərə ümumi bağlılıq birləşdirir. “Bu, bizim həyatımızın, varlığımızın əsasıdır. Bu o deməkdir ki, hamımızı birləşdirən bir şey var”, – Rusiya lideri qeyd etdi.

Həmçinin RF-nın Prezidenti festivalın xarici iştirakçılarını əmin etdi ki, Rusiya dostluğa açıqdır və onların bütün nəcib səylərini dəstəkləməyə hazırdır. “Gəlin düşünək ki, gələcək başladı. Lakin onun necə olacağı sizdən asılıdır”, – Vladimir Putin çıxışının sonunda bildirdi.

ÜGF-2024 hadisələri haqqında sonsuzadək danışmaq olar: onlardan hər biri tamaşaçılara və iştirakçılara çoxlu unudulmaz emosiyalar bəxş etdi. Ümid edirik ki, Ümumdünya Gənclər Festivalı bundan sonra da çox keçiriləcək və bizim uşaqlarımız onun dostluq və əməkdaşlıq mühitinə bir daha qərq ola biləcəklər.