Əfsanəvi azərbaycanlı cazmenin naməlum erkən yazısı tapılıb

Əfsanəvi azərbaycanlı cazmeni, caz muğamının banisi Vaqif Mustafazadənin əvvəllər məlum olmayan səs yazısı aşkarlanıb. Səs yazısını müğənni və caz həvəskarı Tofiq Həsənsoy tapıb. Mustafazadənin 1979-cu ildə son konsertlərindən birində ifa etdiyi əsər Bakı Musiqi Akademiyasının professoru Aydın Əzim Kərimoğluna məxsusdur. Vaqif Mustafazadə gitara ifaçısı Ələsgər Abbasov, nağara ifaçısı Pərviz Ədib və bas-gitara ifaçısı Nazim Quliyevlə birlikdə “Aydın K. Əzim mövzusunda fantaziya”nı ifa edib.

Həsənsoy bildirib ki, Mustafazadə haqqında kitab üzərində işləyir, çoxsaylı məqalə və müsahibələri rus dilindən ana dilinə tərcümə edir. O, gələn il musiqiçinin 85 illik yubileyi üçün kitab buraxmağı, həmçinin Vaqif Mustafazadənin Tallinn-66 və Tallinn-67 caz festivallarındakı çıxışlarından ibarət albom təqdim etməyi planlaşdırır.