Dövlət büdcəsinin gəlir və xərcləri artdı

Milli Məclis “Azərbaycan Respublikasının 2023-cü il dövlət büdcəsi haqqında” qanuna dəyişiklikləri qəbul edib. Nəticədə Azərbaycanın 2023-cü il dövlət büdcəsinin əvvəllər təsdiq edilmiş gəlirləri 30,7 milyard manatdan 33,7 milyard manata, xərcləri isə 33,3 milyard manatdan 36,5 milyard manata yüksəlib. Mərkəzləşdirilmiş gəlirlər və xərclər müvafiq olaraq 33 və 35,7 milyard manatdan çox, yerli gəlirlər isə təxminən 765 və 777 milyon manatdan çox olacaq.

Yeni qanun layihəsi 2023-cü ildə əlavə xərcləri ödəmək üçün maliyyə təminatı yaratmağı hədəfləyir. Bildirilir ki, işğaldan azad edilmiş Qarabağ və Şərqi Zəngəzur iqtisadi rayonlarında yenidənqurma işlərinin sürətləndirilməsi ilə bağlı tədbirlərin maliyyələşdirilməsinə büdcədən 2,2 milyard manat, ölkənin müdafiə qabiliyyətinin və milli təhlükəsizliyinin artırılmasına daha 1,1 milyard manat ayrılacaq.