Canavar musiqi şousunda qalib gəldi

“Maska” verilişinin Azərbaycan versiyasının qalibi canavar maskası ilə çıxış edən müğənni Dilarə Kazımova olub. İkinci yeri Cırtdan maskalı Eldar Qasımov, üçüncü yeri isə qorilla maskası ilə Miri Yusif tutub. Dünyaca məşhur “The Masked Singer” layihəsinin lisenziyalı Azərbaycana uyğunlaşdırılması İctimai Televiziyada 10 dekabr 2023-cü il tarixindən yayımlanır.

Qaliblər tamaşaçıların və münsiflərin səsverməsinin nəticələrinə əsasən müəyyən edilib. Münsiflər heyətində Azərbaycanın xalq artisti Faiq Ağayev, əməkdar artist Coşqun Rəhimov, “Eurovision 2011” qalibi Nigar Camal, teleaparıcı Kamilə Babayeva və teleaparıcı, ifaçı və bəstəkar Murad Arif olub. Aparıcı kimi isə Ağa Nadirov çıxış edib.