Birinci xanımın uğurları

Bu gün Azərbaycanın birinci xanımının 60 yaşı tamam olur. Onun karyerası və digər ölkələrlə humanitar əməkdaşlığın inkişafına verdiyi töhfələr haqqında məqaləni oxuyun.

Mehriban Əliyeva (qızlıq soyadı Paşayeva) 1981-ci ildə Bakıda orta məktəbi qızıl medalla bitirib və oftalmoloq ixtisası üzrə təhsil almağa başlayıb. Nərimanov adına Azərbaycan Dövlət Tibb İnstitutunun müalicə-profilaktika fakultəsinə daxil olub. Məktəbi bitirdikdən sonra Mehriban xanım Seçenov adına Birinci Moskva Dövlət Tibb İnstitutunda təhsilini davam etdirib və 1988-ci ildə fərqlənmə diplomu ilə bitirib. 24 il sonra o, öz almamaterində fəxri professor adına layiq görülüb.

Məktəbi bitirdikdən sonra dörd il Moskvada Helmholtz adına Göz Xəstəlikləri Elmi Mərkəzində işləyən Mehriban xanım daha sonra Azərbaycana qayıdaraq ictimai-siyasi fəaliyyətlə məşğul olub. Mehriban Əliyeva 2004-cü ildən Heydər Əliyev Fondunun prezidentidir və üç dəfə Milli Məclisin deputatı seçilib. 2017-ci ildə Azərbaycan prezidenti İlham Əliyevin sərəncamı ilə ölkənin birinci vitse-prezidenti təyin olunub.

Prezidentin ən yaxın köməkçisi onu bir çox mühüm səfərlərdə müşayiət edir. Məsələn, İlham və Mehriban Əliyevlər may ayında birlikdə Qarabağa səfər edib. Onlar işğaldan azad edilmiş Zəngilan rayonunda doğma yurdlarına qayıdan Xocalılılarla görüşüb.

Mehriban Əliyeva vitse-prezident kimi digər ölkələrlə, xüsusən də Rusiya ilə ictimai və mədəni əlaqələrin möhkəmləndirilməsi üçün çox səy göstərir.

2019-cu ildə birinci xanım Moskvada Xalq Təsərrüfatı Nailiyyətləri Sərgisində “Azərbaycan” pavilyonunu açıb: onun əsaslı bərpası Heydər Əliyev Fondunun dəstəyi ilə həyata keçirilib. Bu ilin may ayında isə fond tərəfindən “Azərbaycan və Rusiya: dostluğun tərənnümü” adlı konsert təşkil edilib. Moskva “Helikon Operası”nın səhnəsində hər iki ölkənin istedadlı və tanınmış ifaçıları Azərbaycan, rus və Avropa bəstəkarlarının dünya şöhrətli əsərlərini təqdim edib. Konsertdə bizi Azərbaycanın xalq artistləri Elçin Əzizov, Yusif Eyvazov, Dinara Əliyeva və başqaları təmsil edib.

Həmin ay fondun icraçı direktoru Anar Ələkbərov Rusiya Federasiyasının mədəniyyət naziri Olqa Lyubimova ilə görüşüb. Həmsöhbətlər ölkələrimizin bir çox sahələrdə, o cümlədən humanitar sahədə sıx əməkdaşlıq etdiyini bildirib, həmçinin ikitərəfli əlaqələrin daha da genişlənməsində Heydər Əliyev Fondunun rolunu vurğulayıb.

Görüş iştirakçıları Səməd Vurğun adına Azərbaycan Dövlət Akademik Rus Dram Teatrının, Bakı Slavyan Universitetinin və Rusiya ali məktəblərinin, habelə, Lomonosov adına Moskva Dövlət Universitetinin və Seçenov adına Birinci Moskva Dövlət Tibb Universitetinin Azərbaycan filiallarının Bakıda uğurla fəaliyyət göstərdiyini vurğulayıb.

Görüşdən iki ay sonra Seçenov Universitetinin rektoru Pyotr Qlıboçko Rusiyanın ən qədim tibb fakültəsinin məzunlarından olan Mehriban Əliyevaya universitetin Bakı filialına verdiyi dəstəyə görə təşəkkürünü bildirib.

Rusiya prezidenti Vladimir Putin də Bakı ilə Moskva arasında əməkdaşlığın inkişafında Azərbaycanın birinci xanımının mühüm rolunu təsdiq edir. Ötən il Mehriban Əliyevanın doğum gününü təbrik edərkən Rusiya lideri Əliyevanın iki ölkə arasında müttəfiqlik əlaqələrinin möhkəmlənməsində şəxsi töhfəsini yüksək qiymətləndirdiyini bildirib.

“Hesab edirəm ki, konstruktiv və çoxşaxəli münasibətlərin gələcək inkişafı tam şəkildə Rusiya və Azərbaycanın dost xalqlarının mənafeyinə uyğundur” deyə Rusiya lideri qeyd edib.

İki dövlətin rəsmiləri arasında dialoq təkcə onlayn rejimdə aparılmır. Mehriban Əliyeva 2019-cu ildə vitse-prezident qismində ilk olaraq Moskvaya səfər edib. Bu ilin avqustunda o, İlham Əliyevlə Vladimir Putinin Azərbaycan prezidentinin iqamətgahında qeyri-rəsmi görüşündə iştirak edib.