Bakıda yeni görüş

Azərbaycan lideri bu gün rusiyalı həmkarını qəbul edib. Görüşün sonunda tərəflər bir sıra mühüm sənədlər imzalayıblar. İki dövlət başçısının nələri müzakirə etdiyini məqaləmizdən oxuyun.

Rusiya lideri Vladimir Putin avqustun 18-də Azərbaycan prezidenti İlham Əliyevlə danışıqlar aparmaq üçün Bakıya gəlib. Rusiya Federasiyasının başçısını hava limanında Azərbaycan Baş nazirinin birinci müavini Yaqub Eyubov, xarici işlər nazirinin müavini Samir Şərifov və Polad Bülbül oğlu qarşılayıblar.

Daha sonra Putin Azərbaycan Prezidentinin iqamətgahına gəlib, onu İlham Əliyev və xanımı Mehriban Əliyeva qeyri-rəsmi şam yeməyinə dəvət edib. İqamətgahda keçirilən görüşdə hər iki ölkənin liderləri bir-birini qucaqlayıb, səmimi salamlayıblar. Putin Azərbaycanın birinci xanımına gül dəstəsi təqdim edib.

Proqramın əsas rəsmi və işgüzar tədbirləri avqustun 19-da baş tutub. Rusiya Federasiyasının Prezidenti ənənəyə uyğun olaraq, Fəxri xiyabana gedərək Azərbaycanın ümummilli lideri Heydər Əliyevin məzarı önünə əklil qoyub.

Dar və geniş tərkibdə ikitərəfli danışıqların ümumilikdə iki dövrəsi baş tutub.

İlham Əliyev görüşdə Cənubi Qafqazda sabitliyin Azərbaycanla Rusiya arasında münasibətlərdən asılılığını vurğulayıb. İndi ölkələrimiz müttəfiq, dost və yaxın tərəfdaş kimi çıxış edirlər, deyə Azərbaycan dövlət başçısı qeyd edib.

Bundan əlavə, İlham Əliyev BMT-nin 29-cu İqlim Konfransına (COP29) ev sahibi kimi ölkəmizi dəstəklədiyinə görə rusiyalı həmkarına təşəkkür edib.

Öz növbəsində Rusiya Prezidenti Vladimir Putin Rusiyanın Azərbaycanla çoxşaxəli və dostluq əlaqələrinin inkişafına böyük önəm verdiyini qeyd edib, həmçinin Rusiya şirkətlərinin işi üçün yaradılmış əlverişli şəraitə görə Bakıya təşəkkür edib. Onun sözlərinə görə, iki ölkə arasında ticarət dövriyyəsi 18% artaraq, Rusiya Federasiyasından Azərbaycan iqtisadiyyatına investisiyalar 4 milyard dolları ötüb.

Vladimir Putin Bakıda Rusiya-Azərbaycan universitetinin açılması planlarından da xəbər verib. Layihəyə Rusiya tərəfdən Sankt-Peterburq Dövlət Universiteti qoşulmağa hazırdır. İlham Əliyev bu fikri dəstəkləyib.

Danışıqların yekunu olaraq Vladimir Putin İlham Əliyevi MDB Dövlət Başçıları Şurasının Moskvada keçiriləcək iclasına və Kazanda BRİKS sammiti çərçivəsində keçiriləcək görüşə dəvət edib – hər iki tədbir oktyabrda keçiriləcək.

Geniş tərkibdə keçirilən Azərbaycan-Rusiya danışıqları zamanı İlham Əliyev bildirib ki, Azərbaycan Rusiya ilə bütün sahələrdə qarşılıqlı fəaliyyətin gücləndirilməsinə sadiqdir. Onlardan biri sənaye kooperasiyası olacaq.

İclasda Vladimir Putinin dediyi kimi, Rusiyanın “Transmaşholdinq” şirkəti Bakı Metropoliteni üçün vaqonlar istehsal edəcək. Bundan əlavə, Azərbaycan gəmi inşaatçıları rusiyalı həmkarları ilə birlikdə neft məhsullarının daşınması üçün tankerlər hazırlamağa başlayırlar ki, bu da enerji resurslarının dünya bazarlarına çıxarılmasını artıracaq.

Danışıqların iki dövrəsi başa çatdıqdan sonra hər iki dövlətin başçıları birgə bəyanatla çıxış ediblər. Söhbət ikitərəfli sənaye və kənd təsərrüfatı sahəsində əməkdaşlığın daha da gücləndirilməsi, turizm və tranzit axınlarının, eləcə də Şimal-Cənub beynəlxalq nəqliyyat dəhlizi boyunca yükdaşımaların və infrastrukturun genişləndirilməsindən gedir.

Birgə bəyanata əlavə olaraq, görüşün yekunlarına görə Azərbaycan və Rusiya arasında əməkdaşlığa dair – qida təhlükəsizliyi sahəsində, karantin və bitkilərin mühafizəsi sahəsində, o cümlədən səhiyyə və tibbi təhsil sahəsində- üç hökumətlərarası saziş imzalanıb.

Bakı və Moskva həmçinin üç memorandum imzalayıb. Onlardan biri, birgə iqlim layihələrinin başlanması imkanlarını yaradacaq, aşağı karbonlu inkişaf sahəsində əməkdaşlığa həsr olunub.

Danışıqlardan sonra iki ölkənin liderləri “Bakı Ağ şəhəri” ziyarət ediblər: bu şəhərsalma layihəsi paytaxtın şərq hissəsinin hərtərəfli inkişafına yönəlib. Azərbaycan Prezidenti səfərinin sonunda rusiyalı qonağın şərəfinə “Gülüstan” sarayında dövlət ziyafəti verib.