Avtomobillər havanı daha çox çirkləndirir

Dövlət Statistika Komitəsinin məlumatına görə, 2023-cü ildə atmosferə atılan tullantıların həcmi 34,5 min ton artaraq 965,1 min ton təşkil edib. Onların əksəriyyəti avtomobillərdən atılan tullantılar olub – 820,8 min ton və ya 85%. İl ərzində avtomobillərdən atılan tullantılar 6,3% artıb, stasionar mənbələrdən isə 8,9% azalıb.

Bildirilir ki, ötən il təmizləyici qurğular şəklində aparılan profilaktik tədbirlərlə stasionar mənbələrdən gələn zərərli maddələrin 67,3 faizi zərərsizləşdirilib. Sənaye müəssisələrində texnoloji proseslərin və mövcud təmizləyici qurğuların səmərəliliyinin təkmilləşdirilməsi il ərzində atmosfer havasına 85,2 min ton zərərli maddələrin atılmasının qarşısını almağa imkan verib.